আহা, ইলা দিন যদি আইত


দইখ্না ঘরর মামু রেবা
দইখনা ঘরর মামু
তুমার লগে ভাইব্-ছি কাইল
মামুদপুরো যামু।

মামুদপুরো যাইমু আমি
নানার বারিত যাইমু
নানার বারিত গিয়া আমি
পাকনা কাঠল খাইমু।

পাকনা কাঠল খাইমু হাসাও
গাছর পাকনা খাইমু
ডাঙর চাইয়া পাকনা কাঠল
একলা কিলা খাইমু।

একলা কিলা খাইমু রেবা
একলা কিলা খাইমু
বাদর ঘরর ফুফির বেটা
অগ্গুরে লগে লইমু।

বাদর ঘরর ফুফির বেটা
চাংকি ডাকইন মায়ে
স্কুলো ডাকইন সাহাবুদ্দিন
শাজান ডাকাইন গায়ে ।

শাজান রেবা , বাইতশা আমার
মুড়োত খারাইল থাকইন
দুরত তনে দেইখলে আমারে
শরম করি ভাগইন।

শরম করি ভাগইন কেনে
মনত কালি নাই
পুরি দেইখলে জিলকি দেইন
ওলা পুলাও নাই।

চাকরিতো তাইন বালাও করইন
টাফিক বান্ছ কাম
মুড়োত খারাই বাশিত ফুকলে
দৌরত ছুটইন জাম।

বড়ো বালা পুলা রেবো
মিঠা মিঠা বাত
ওগুউরেবা আমার পসন্দ্
আগ বাড়াওবা মাত ।

মাইমু রেবা, বাপর হালা
মাতি দিবায় নি
ইলা পুলা আজুবাজু
খুজি পাইবায় নি।

কিলা খেত, বাড়ি ককটা
গুল্লাত আছইন ধান
মুরুব্বী বাড়ির পুলা রেবো
আমার সাজান চান্দ।

অগুর লাগি পাগল রেবা
বড় মিঠা হাসে
ইলা মিঠাস চান্দু আমার
চখুত খালি ভাসে।

ওগু ছারা বাইচতাম নাবা
আমার ওগুও লাইগবো
কাজী মাতো, মামু রেবা
নিকা পাততেও লাইগবো ।

সুপ্রদীপ দত্তরায়

Comments